SKORING | Kredit tashkilotlari sizga pul berish-bermaslikni qanday hal qilishadi?

Oddiy qilib aytganda, skoring - bu kreditorlarga kredit olish uchun ariza bergan shaxsning to'lov intizomini bashorat qilishga yordam beradigan baholash tizimi.

Ya'ni, ushbu 'ixtiro' tufayli insonning kredit qarzini qaytarish ehtimolini va unga pul berishga arziydimi-yo'qligini osongina tushunish mumkin.

Kredit beruvchilar oldida o‘z kredit layoqatingizni qanday oshirish mumkin?
Buning uchun, eng avvalo, kreditlaringizni o'z vaqtida va tartibli to'lab borishingiz kerak. Muddati o'tgan to'lovlar kredit tarixingizni yomonlashtiradi, u esa skoring ballini hisoblashda eng katta ahamiyatga ega.

To'lovlarni doim o'z vaqtida amalga oshirsangiz ham, kredit tarixingiz holatini muntazam ravishda tekshirib borishingiz lozim. Shunda siz barcha ma'lumotlar to'g'ri aks ettirilganiga ishonch hosil qilasiz. Ba'zida banklar qarz to'langanligi haqidagi ma'lumotni kredit byurosiga yuborishni unutishadi va natijada kredit tarixingizda qarzdorlik (muddati o'tgan to'lov) paydo bo'ladi.